Mental Health Deep Savers

(Paano ko nilabanan ang Stress, Anxiety, Depression, Negativity, OCD, at Procrastination)

Bilang pari, hindi na mabilang ang mga personal na kakilala, minsan nga ay estranghero pa, na biglang magpapadala ng mensahe sa akin upang magkwento ng pinagdaraanang mental health issues.

Napakarami ring kabataan na ang mensahe sa akin ay tungkol sa pag-iisip o minsan pa nga ay pagpaplano ng kanilang self-deletion na wari mo'y ganoon lamang kadaling burahin ang sarili sa mundo.

Meron ding nagsasabi sa akin tungkol sa pananakit at pagsusugat ng sariling katawan o balat.

Iilan lamang sila sa mga naglakas loob na magbukas ng sarili sa pagbahagi ng pinagdaraanan, subalit higit na marami ang tahimik na nakikipagbuno sa takot na magbukas ng sarili.

Ako mismo na alagad ng Diyos ay dumaan din sa pagsubok na ito. Alam ko, first hand by experience, ang pasakit ng chronic stress, burnout, anxiety, insomnia, obsessiveness, at matinding lungkot dahil sa personal na mga pagsubok na aking naranasan.

Alam ko din na minsan mas nais mo na lang manahimik dahil sa maraming beses na hindi ka rin naman maiintindihan. Madalas, iisipin mong baka nakakaabala ka lamang, o natatakot na baka husgahan. Higit sa lahat, limitado ang counselors sa ating bansa, at mahal din ang gamutan ng ganitong sakit.

Laman ng aklat na ito ang mga paraan kung paano ko nalampasan ang pasakit ng aking mental health problems. Ito ang DEEP SAVERS na siyang nakatulong sa akin ng husto upang unti-unting makabangon at maka-recover sa aking mental health issues.

Sharing is caring, ika nga. Kaya tinuring kong isang responsibilidad na magshare ng aking mga pinagdaanan at kung paano ko ito nalampasan.

 Umaasa ako at nananalangin na sana ay makatulong ito sa napakaraming taong tahimik na nakikipagbuno sa mental health problems.